गडब/सुरेश म्हात्रे
खोपोली व आसपासच्या परिसरातील ग्राहकाना नॅचरल गॅसचा पुरवठा सुरळित होण्यासाठी महानगर गॅसने खालापूर- सावरोली येथे सिटी स्टेशन (सीजीएस) सुरू केले आहे. रायगड जिल्ह्यातील सीजीएसचे हे पहिले स्टेशन आहे. यामुळे परिसरातील नागरिकांना घरोघरी देणारा महानगर गॅस तसेच वाहनांसाठी सीएनजी गॅसचा आता अखंडीत पुरवठा होणार आहे.
महानगर गॅसतर्फे सीएनजी गॅस स्टेशन अनेक महामार्गावर उभारण्यात आले आहेत. घरगुती ग्राहकांसाठी पाईप गॅस पुरवठा मुंबई- ठाणे - नवी मुंबईबाहेरील क्षेत्रासाठीही करावा अशी ग्राहकांची मोठी मागणी होती. त्यानुसार कंपनीने खालापूर तालुक्यातील सावरोली येथे सीजीएस सेंटर नुकतेच सुरू केले.
आम्ही ग्राहकांना जास्तीतजास्त सेवा पुरवण्याच्या प्रयत्नात असतो. सावरोली येथील नवीन सीजीएस सेंटरमुळे रायगड जिल्ह्यातील ग्राहकाना अखंडीत गॅस पुरवठा करणे शक्य होणार आहे. रायगडमध्ये आणखी सीजीएस सेंटर सुरू करण्याचा आमचा प्रयत्न आहे.
• आशु सिंघल, महानगर गॅस व्यवस्थापकीय संचालक
यामुळे परिसरातील घरगुती ग्राहकाना पाईप गॅसद्वारे गॅस पुरवठा केला जाऊ शकतो. परिणामी गॅस सिलिंडरवर ग्राहकाना आता अवलंबून राहण्याची वेळ येणार नाही.
सावरोली येथील सीजीएस हे गेलच्या दहेज - उरण गॅस ट्रान्समिशन पाईपलाईनला आणि नॅशनल गॅस ट्रान्समिशन सिस्टीमला थेट कनेक्टिव्हीटी प्राप्त करून देत आहे. यामुळे महानगर गॅसला सुरक्षित व अखंडीत गॅस पुरवठा करता येणार आहे.
