गडब/सुरेश म्हात्रे
पेण उपजिल्हा रुग्णालयातील डॉक्टर मनेषकुमार खोलवडीकर यांना रुग्णा कडून पेण पोलिसांच्या समोरच मारहाण करण्याची घटना शनिवारी पहाटे घडली. विशेष म्हणजे सदर रुग्ण राजू पाटी हा डॉक्टर मनेषकुमार खोलवडीकर यांना मारहाण करताना व नर्स, सुरक्षा रक्षक यांना अर्वाच्च व अरेरावीची भाषा वापरत असताना तेथे उपस्थित असलेल्या दहा ते बारा पोलिसांनी मात्र बघ्याची भूमिका घेतली होती. पोलिसांच्या समोर ही घटना घडल्याने पेण पोलिसांच्या भूमिकेवर प्रश्न चिन्ह निर्माण होत आहे. रात्री उशिरा राजू पाटील विरोधात पेण पोलिसांनी गुन्हा दाखल केला आहे.
सविस्तर घटना अशी की, वरेडी, ता.पेण येथील राजू गोपाळ पाटील ( वय 37) या तरुणाचा तांबडशेत गावातील विहिरी जवळील रस्त्यावर पहाटे मोटारसायकल घसरून अपघात झाला. या अपघातात राजू पाटील याच्या डोळ्याला गंभीर इजा झाली. त्याला उपजिल्हा रुग्णालयात दाखल केल्या नंतर त्याच्या डोळ्यावर डॉक्टर खोलवडीकर हे प्राथमिक उपचार करण्याच्या तयारीत असताना आरोपी राजू पाटील याने हल्ला केला, व डॉक्टरांना लाथा बुक्क्याने मारहाण करून सरकारी कामात अडथळा निर्माण केला. तसेच कर्तव्यावर असलेल्या नर्स व सुरक्षा रक्षक यांना अर्वाच्च व अरेरावीची भाषा वापरली. यावेळी मारहाण होत असताना आरोपीचे नातेवाईक तसेच उपजिल्हा रुग्णालयात उपस्थित असलेल्या पेण पोलीस स्टेशनच्या दहा ते बारा पोलिसांनी देखील कोणताही हस्तक्षेप न करता फक्त बघ्याची भूमिका घेतल्याने डॉक्टर, नर्स व उप जिल्हा रुग्णालयाच्या कर्मचाऱ्यांकडून तीव्र नाराजी व्यक्त केली जात आहे.
शासकीय कर्मचाऱ्यांना मारहाण व सरकारी कामात अडथळा केल्या प्रकरणी पेण पोलीस स्थानकात भादवि कलम 353, 332 अन्वये गुन्हा दाखल करण्यात आला आहे. या घटने बाबत अधिक तपास पेण पोलीस करत आहेत.
चौकट-
आम्ही दिवस-रात्र रुग्णांना सेवा देत असतो. उप जिल्हा रुग्णालय पेण येथे अनेक प्रकारचे रुग्ण येत असतात. मात्र राजू पाटील या रुग्णाने माझ्यावर केलेला हल्ला व माझ्या कर्मचाऱ्यांना अर्वाच्च भाषेत केलेली दमदाटी ही निंदणीय आहे. हल्ला व दमदाटी करणाऱ्या रुग्ण नातेवाईकांवर कठोर कारवाई व्हावी.
- डॉ. मनेषकुमार खोलवडीकर, वैद्यकीय अधिकारी, पेण-उपजिल्हा रुग्णालय
