📍जेएसडब्लू स्टील कंपनीत स्थानिकांच्या नोकरीबाबत शिवसेना ठाकरे गट आक्रमक स्थानिकांना नोकरीत प्राधान्य न दिल्यास कंपनीत घुसून आंदोलन करण्याचा विष्णूभाई पाटील यांचा इशारा सुभाष देसाई, विष्णूभाई पाटील व शिवसेनेच्या प्रमुख नेत्यांच्या नेतृत्वाखाली 12 ऑगस्ट रोजी होणार जेएसडब्लू स्टील कंपनीवर जन आंदोलन📍

  गडब/सुरेश म्हात्रे                                                

जेएसडब्लू स्टील कंपनीत स्थानिकांच्या नोकरीबाबत शिवसेना ठाकरे गट आक्रमक झाला असून स्थानिकांना नोकरीत प्राधान्य मिळावे यासाठी शिवसेनेचे नेते माजी उद्योग मंत्री सुभाष देसाई, उपनेते विजय कदम, विष्णूभाई पाटील, बबनदादा पाटील, माजी आमदार मनोहर भोईर, सह संपर्क प्रमुख किशोरभाई जैन, जिल्हाप्रमुख सुरेंद्र म्हात्रे, दिपश्री पोटफोडे, जगदीश ठाकूर यांच्या नेतृत्वाखाली 12 ऑगस्ट रोजी 11 वाजता जेएसडब्लू स्टील कंपनीवर जन आंदोलन करण्यात येणार आहे. 

    "जेएसडब्लू स्टील कंपनीत नोकरीत स्थानिकांना 15 दिवसात प्राधान्य न दिल्यास कंपनीत घुसून आंदोलन केले जाईल. हिंदू हृदय सम्राट बाळासाहेब ठाकरे यांनी मुंबईत 'हटाव लुंगी, बजाव पुंगी' असा नारा देत परप्रांतीय यांच्या विरोधात आंदोलन केले होते. आम्ही त्यांच्याच पठडीत तयार झालेले शिवसैनिक असून मुंबईतील आंदोलनाची पुनरावृत्ती करून स्थानिकांना न्याय मिळवून दिला जाईल. त्यासाठी गुन्हे अंगावर घेण्याची तयारी आहे." असा इशारा विष्णूभाई पाटील यांनी पेण येथे घेतलेल्या पत्रकार परिषदेत दिला. यावेळी सुरेंद्र म्हात्रे यांनी आंदोलनाची पार्श्वभूमी सांगितली.

     12 ऑगस्ट रोजी 11 वाजता जेएसडब्लू स्टील कंपनीवर जन आंदोलन करण्यात येणार आहे. त्यासंदर्भात माहिती देण्यासाठी पेण येथील शिवसेना कार्यालयात पत्रकार परिषद घेण्यात आली. यावेळी विष्णूभाई पाटील, सुरेंद्र म्हात्रे, जगदीश ठाकूर,दिपश्री पोटफोडे, समीर म्हात्रे, दिलीप पाटील, जीवन पाटील, बाळू पाटील, विजय पाटील, देवदत्त पाटील, लवेंद्र मोकल, वसंत म्हात्रे, चेतन मोकल यांच्यासह पदाधिकारी उपस्थित होते.

      स्थानिक भूमिपुत्रांची नोकरभरती झालीच पाहिजे, पाटणसई ते डोलवीमधील ४५ गावांना फिल्टर पाणी पुरवठा झालाच पाहिजे,

बार्जेस वहातुकीसाठी खाड्यांची खोली वाढवली. बार्जेसच्या लाटांनी खारबंदीस्ती बांध फुटुन पिकत्या भातशेतीत खारेपाणी शिरून शेती नष्ट झाली. त्याठिकाणी मॅग्रोज झुडुपे वाढली आहेत. तसेच ढोंबी, माचेला, गडब-कारावी येथिल सुमारे २००० एकर पिकती शेतजमिन खारबंदिस्ती अभावी नष्ट झाली. शेतीवर अवलंबुन कुटुंबाचा रोजगार गेला त्यामुळे त्यांची आर्थिक परिस्थिती बिकट झाली आहे. 

कंपनीच्या हवेतील प्रदुषणामुळे परिसरातील घरांवर काळ्या राखेचे थर बसले आहेत. त्यामुळे आरोग्याचा प्रश्न निर्माण झाला आहे, कंपनीमार्फत रसायनयुक्त पाणी धरमतर खाडीत सोडल्याने मच्छीमारांवर उपासमारीची वेळ आली आहे. तसेच दुर्गंधी व उघाडींचा प्रश्न निर्माण झाला आहे. याबाबत ठोस निर्णय झाला पाहिजे. या वरील मागण्यासाठी हे जन आंदोलन करण्यात येणार आहे.

         पेण, अलिबाग, रोहा, सुधागड, येथिल डिग्री, डिप्लोमा धारक व अकुशल तरुणांश ग्रामस्थांनी या आंदोलनात मोठ्या संख्येने उपस्थित राहण्याचे आवाहन विष्णूभाई पाटील यांनी केले. 

    या आधीही जेएसडब्लू कंपनी विरोधात अनेकदा उपोषण, मोर्चे काढण्यात आले होते. त्यावेळी स्थानिकांना प्रकल्पात प्राधान्य दिले जाईल तसेच शुद्ध पाणी संदर्भात शासन स्तरावर करारनामा करण्यात येईल व नवीन पाईपलाईन टाकल्यानंतर फिल्टर प्लांट बसून पाण्याचा पुरवठा करण्यात येईल. असे असे लेखी आश्वासन कंपनी व्यवस्थापनाचे प्रतिनिधी आत्माराम बेटकीकर व ओम पवार यांनी तहसीलदारांसमोर दिले होते त्याची पूर्तता अजूनही पूर्तता झाली नाही. तसेच भरती प्रक्रियेत परप्रांतीयांना मोठया संख्येने स्थान दिले जात असल्याने हे जन आंदोलन करण्यात येत असल्याचे विष्णूभाई पाटील यांनी सांगितले.