🛑खैरे गावामध्ये रंगणार श्री हनुमान मूर्ती प्राणप्रतिष्ठा व कलशारोहण सोहळ्याचा भव्य उत्सव!

Responsive Ad Here

✍🏻रायगड / अवंतिका म्हात्रे

धारवणे तालुक्यातील खैरी (पोस्ट शेणवे) येथे समस्त ग्रामस्थ मंडळ आणि परिसरातील भाविकांच्या सहकार्याने भव्य श्री हनुमान मंदिर मूर्ती प्राणप्रतिष्ठा व कलशारोहण सोहळ्याचे आयोजन करण्यात आले आहे. वैशाख पौर्णिमेच्या शुभ मुहूर्तावर शुक्रवार, दि. १ मे २०२६ ते रविवार, दि. ३ मे २०२६ या कालावधीत हा मंगलमयी सोहळा संपन्न होणार आहे.

या सोहळ्याला योगी फुलनाथजी बाबा (टाकेश्वर मठ), ह.भ.प. शिवराम बाबा म्हस्कर, ह.भ.प. गणेश बाबा भालेराव (आळंदी), अलोकनाथ महाराज (तानसा) आणि योगी नरेंद्र महाराज यांसारख्या थोर संतांचे शुभाशीर्वाद लाभणार आहेत. ह.भ.प. योगेश महाराज घरत (आळंदीकर) आणि ह.भ.प. कमलाकर महाराज विशे (बेडिसगाव) यांच्या मार्गदर्शनाखाली हा कार्यक्रम पार पडणार आहे.

तीन दिवसीय कार्यक्रमाची रूपरेषा:

दिवस पहिला: शुक्रवार, दि. ०१/०५/२०२६

कार्यक्रमाची सुरुवात पहाटे काकड आरतीने होईल. सकाळी गंगापूजन व देवता आवाहन करण्यात येईल. दुपारी ग्रामप्रदक्षिणा व मूर्तीची भव्य मिरवणूक काढण्यात येईल. रात्री नाशिकचे ह.भ.प. सौरभ महाराज जाधव यांचे कीर्तन होईल, त्यानंतर जय गणेश प्रसादिक भजनी मंडळाचा जागर होईल.

दिवस दुसरा: शनिवार, दि. ०२/०५/२०२६

या दिवशी गणेश पूजन, होम-हवन आणि मूर्ती जलाधिवास-धान्याधिवास हे धार्मिक विधी पार पडतील. सायंकाळी संगमनेरचे ह.भ.प. सुनील महाराज मंगलापूरकर यांचे कीर्तन रंगणार असून, रात्री गुरुकृपा भजनी मंडळ, शेणवे यांचा भजनाचा कार्यक्रम होईल.

दिवस तिसरा (मुख्य सोहळा): रविवार, दि. ०३/०५/२०२६

या दिवशी सकाळी ठीक ८:३५ वाजता मान्यवर साधू-संतांच्या शुभहस्ते मूर्ती प्राणप्रतिष्ठा व कलशारोहण सोहळा संपन्न होईल. त्यानंतर सकाळी ९:३० ते ११:३० या वेळेत ह.भ.प. वासुदेव महाराज ढोळे (लोणाड, भिवंडी) यांचे काल्याचे कीर्तन होईल.

महाप्रसादाचे आयोजन

तीनही दिवस भाविकांसाठी भोजनाची व महाप्रसादाची चोख व्यवस्था करण्यात आली आहे. ठाकरे परिवार, धारवणे परिवार आणि संतोष व विजय भेरे (धसई) तसेच सविता डोहळे यांच्याकडून अन्नदानाचे विशेष सौजन्य लाभले आहे.

"संतांच्या आशीर्वादाने आणि ग्रामस्थांच्या एकजुटीने हा भक्तिमय सोहळा आयोजित केला आहे. तरी सर्व भाविकांनी उपस्थित राहून दर्शनाचा व महाप्रसादाचा लाभ घ्यावा," असे आवाहन व्यवस्थापक, ग्रामस्थ मंडळ खैरे व परिसर यांनी केले आहे.