📍राजेश मोकल यांची सरपंच पदावरून उचलबांगडी📍

गडब/सुरेश म्हात्रे

वडखळ ग्रामपंचायतचे सरपंच राजेश भिकाजी मोकल यांनी आपले सरपंच पद वाचविण्यासाठी वेगवेगळया राजकीय पक्षांमध्ये बेडूक उडया मारुन देखील आपले सरपंच पद वाचवू शकले नाहीत. काँग्रेस, भाजप, राष्ट्रवादी काँग्रेस पुन्हा भाजप असा राजकीय पक्षांचा प्रवास राजेश मोकल यांनी केला आहे. भाजपमध्ये गेल्यावर आपले सरपंच पद वाचेल असे राजेश मोकल यांना वाटत होते. परंतू, भाजपच्याच ग्रामविकास मंत्र्यांनी राजेश मोकल यांच्याविरुध्द निर्णय दिला. राजेश मोकल यांना निलंबित केले असून हा लढा लढणारे विवेक म्हात्रे मात्र यांनी तेरा दिवसांपुर्वीच अखेरचा श्वास घेतल्याने त्यांना उत्तरकार्याच्या दिवशी न्याय मिळाला.

पेण तालुक्यातील आर्थिकदृष्टया संपन्न व बाहूबली नेत्यांचे साम्राज असणारी ग्रामपंचायत म्हणजे वडखळ ग्रामपंचायत. वडखळ ग्रामपंचायतचे सरपंच राजेश भिकाजी मोकल यांनी ग्रामपंचायतीमध्ये पदाचा गैरवापर करुन वेळोवेळी मोठया प्रमाणात अफरातफर करुन भ्रष्टाचार केला होता. या भ्रष्टाचारामुळे राजेश मोकल यांचे सरपंच पद धोक्यात आले होते. त्यावेळी राजेश मोकल यांनी भाजपला सोडचिठ्ठी देउन वडखळ नाक्यावर शक्ती प्रदर्शन करत राष्ट्रवादीमध्ये प्रवेश केला होता. त्यावेळी राज्यात राष्ट्रवादीची सत्ता होती. त्यामुळे राष्ट्रवादीकडून अभय मिळेल व सरपंच पद वाचेल अशी राजेश मोकल यांना आशा होती. परंतू, तोपर्यंत मुख्याधिकाऱ्यांकडून कारवाई पूर्ण झाली होती. परंतू राष्ट्रवादीच्या सत्तेमुळे निर्णय येण्यास विलंब होत होता. त्याच सुमारास राज्याच्या सत्तेत परिवर्तन झाले.

शिवसेना (शिंदे गट)-भाजप सत्तेत आले आणि त्याच सुमारास कोकण आयुक्तांनी 23 डिसेंबर 2022 रोजी महाराष्ट्र ग्रामपंचायत अधिनियम कलम 39 (3) नुसार राजेश मोकल यांना वडखळ सरपंच पदावरुन निलंबित करण्यात आले. त्यानंतर राजेश मोकल यांनी पुढे ग्रामविकास मंत्र्यांकडे कोकण आयुक्तांच्या निर्णयाविरुध्द अपील केला आणि पुन्हा एकदा सरपंच पद वाचविण्यासाठी राष्ट्रवादीचे घडयाळ सोडून भाजपमध्ये स्थानिकांची इच्छा नसताना देखील प्रवेश केला.

फक्त प्रवेश करण्यामागे एकच इच्छा होती ती म्हणजे सरपंच पद वाचावे. कोकण आयुक्तांच्या निर्णयाला भाजपच्या प्रवेशानंतर स्टे मिळला. परंतू, तो स्टे जास्त दिवस टिकू शकला नाही.

    ग्रामविकास मंत्री गिरीश महाजन यांनी अखेर 19 जून 2023 रोजी आपला निकाल जाहीर करुन राजेश मोकल यांचा अपील फेटाळला व विभागीय आयुक्त कोकण विभाग यांनी 23 डिसेंबर 2022 ला दिलेला निकाल कायम ठेवत राजेश मोकल यांना सरपंच पदावरुन निलंबित केले. राजेश मोकल यांच्या निलंबनावरुन राजकीय गावपुढाऱ्यांसाठी एक नकळत संदेश मिळाला आहे. भ्रष्टाचार केल्यास कोणताच पक्ष वाचवू शकत नाही हेच खरे.

     वडखळ नाक्यावर वाजले फटाके

गेली दोन वर्ष विनोदिनी कोळी, विवेक म्हात्रे आणि त्यांचे सहकारी राजेश मोकल यांच्या भ्रष्टाचाराविरुध्द लढाई देत होते. परंतू दरवेळेला राजेश मोकल पक्षांतर करुन आपले पद वाचवत होते. परंतू अखेर सत्याचा विजय होत ग्रामविकास मंत्र्यांनी राजेश मोकल यांच्याविरूध्द दिलेल्या निकालाची प्रत हातात मिळताच वडखळ नाक्यावर जल्लोष साजरा करत फटाके वाजवले.

 मृत्यूनंतर मिळाला न्याय

वडखळचे सरपंच राजेश मोकल यांनी केलेल्या भ्रष्टाचाराविरोधात विवेक म्हात्रे गेली कित्येक वर्षे लढा देत होते. मात्र प्रत्येक वेळी ते वाचले. अखेर विवेक म्हात्रे यांच्या उत्तरकार्याच्या दिवशी ग्रामविकास मंत्री गिरीश महाजन यांनी राजेश मोकल यांच्याविरुध्द निकाल दिल्याने त्यांच्या कुटूंबियांनी समाधान व्यक्त केले. त्यांच्या तेराव्याच्या दिवशी निकालाची प्रत मिळाल्याने त्यांनी अन्याविरुध्द दिलेल्या लढाईचा विजय झाला असल्याचे ग्रामस्थांनी सांगितले.